National Emblem of Kazakhstan

Қазақстан Республикасы Президентінің

ресми сайты

Қазақстан Республикасы Президентінің

ресми сайты

Президент Әкімшілігі


Жаңалықтар

Қазақстан Республикасы Қауіпсіздік Кеңесі жанындағы Сарапшылық кеңестің отырысы өтті

 

Сарапшылық кеңес отырыстарын өткізу тәжірибесінде пікірлесу алғаш рет Қазақстанның жетекші университеттерінің, Алматы қаласындағы зерттеу институттары мен қорлардың сарапшыларының, сондай-ақ мемлекеттік органдар басшыларының қатысуымен бейнеконференция байланысы арқылы өтті.

Күн тәртібінде үкіметтік емес ұйымдардың, қорлар мен зерттеу орталықтарының жұмысындағы жаңа үрдістер, сондай-ақ мемлекеттік органдардың ұлттық қауіпсіздік саласындағы болжамдық-талдамалық жұмыстарының мәселелері қамтылды.

Талқылау барысында ҚР Президентінің Көмекшісі – Қауіпсіздік Кеңесінің хатшысы Қ.П.Қожамжаров үкіметтік емес ұйымдардың елдің әлеуметтік-экономикалық және қоғамдық өмірінде алатын маңызды жасампаздық рөліне ерекше тоқталды.  

Сарапшылар Қазақстанның үкіметтік емес ұйымдар саласын реттейтін заңнамасы ТМД кеңістігі бойынша мейлінше либералды саналатынын, ел үкіметі азаматтық бастамаларды дамытуға жан-жақты жағдай жасап келе жатқанын атап өтті.  

Қ.Қожамжаров үкіметтік емес ұйымдар қызметіндегі аса түйткілді мәселелерге ерекше назар аудара отырып, олардың ең маңызды миссиясы – Қазақстанның орнықты әрі табысты дамуы екенін айтты. Осыған орай ол ұлттық және халықаралық үкіметтік емес ұйымдарды, қорлар мен институттарды мемлекет пен қоғам үшін стратегиялық маңызы бар міндеттерді орындауда сындарлы қарым-қатынас орнатуға шақырды.

Президент Көмекшісі – Қауіпсіздік Кеңесінің хатшысы аумалы-төкпелі халықаралық жағдай мен ұлттық қауіпсіздік алдында тұрған сын-қатерлер отандық сарапшылар қауымы мен мемлекеттің өзара тығыз қарым-қатынас орнатуын талап ететінін айтты.

Отырыс қорытындысы бойынша Сарапшылық кеңес нақты ұсынымдар берді, олар Қауіпсіздік Кеңесі мен оның ведомствоаралық комиссиялары жұмысы барысында пайдаланылатын болды.


Кері қайту Кері қайту Twitter Facebook Басып шығару